Имрӯз бо ташаббуси шуъбаи рушди сайёҳии Мақомоти иҷроияи ҳокимияти давлатии шаҳри Душанбе бо мақсади дар сатҳи баланд таҷлил намудани Рӯзи пойтахти Ҷумҳурии Тоҷикистон – шаҳри Душанбе, инчунин рушду тавсеаи соҳаи сайёҳӣ, муаррифии иқтидори сайёҳии пойтахти кишвар ва дар ин замина ҷалби бештари сайёҳони дохиливу хориҷӣ ба шаҳри Душанбе дар Муассисаи давлатии “Майдони Истиқлол” Намоиши аксҳои Душанбе ва пресс тур доир гардид.

Дар намоиши мазкур 100 адад аксҳо аз манзараҳои зебо ва маконҳои сайёҳии пойтахт, ки аз ҷониби аксбардори маъруфи кишвар Дидор Саъдуллоев аксбардорӣ шудааст ва дар сомонаҳои иҷтимоии Фейсбук (Dushanbe-travel), Инстаграм (Dushanbe.travel), ВКонтакте (Dushanbe.travel), Тридс (Dushanbe.travel), Тик-Ток (Dushanbe.travel) ва Телеграмм (Dushanbe.travel)-и шуъбаи рушди сайёҳии Мақомоти иҷроияи ҳокимияти давлатии шаҳри Душанбе инъикос мегардад, рӯнамоӣ гардид.

Дар кори он роҳбарияти Мақомоти иҷроияи ҳокимияти давлатии шаҳри Душанбе ва Кумитаи рушди сайёҳии назди Ҳукумати ҷумҳурии Тоҷикистон иштирок ва суханронӣ намуда, қайд карданд, ки ин ҳама пешравиҳои рӯзафзун ва рушду тараққиёт маҳз ба туфайли Истиқлоли давлатӣ, Ваҳдати миллӣ, сулҳи саросарӣ, амнияту субот ҳамчун пойдевор ва маншаи ҳамаи пешрафту комёбиҳои назаррас дар соҳаҳои мухталифи шаҳрдорӣ рӯйи кор омада, умеди мардумро ба ояндаи дурахшони давлати соҳибистиқлол беш аз пеш афзун менамояд.

Воқеан пойтахт муаррифи давлату миллат буда, барои бегазанду беолоиш нигоҳ доштан ва ба оламиён ба таври шоиста шинос кардани он кормандони мақомоти давлативу ниҳодҳои ҷомеаи шаҳрвандӣ ва ҳар сокини ватандӯсти мамлакат вазифадору масъул мебошад. Амалҳои бунёдкорӣ ва созандагӣ мо, ҷавононро водор месозанд, ки ба қадри Истиқлоли давлатӣ, сулҳу суботи саросарӣ бирасем ва дар татбиқи сиёсати пешгирифтаи Пешвои миллат муҳтарам Эмомалӣ Раҳмон ва иқдоми наҷибонаи Раиси шаҳри Душанбе муҳтарам Рустами Эмомалӣ саҳми назаррас гузорем.

Чорабинии имрӯза бо ташкили пресс тур оид ба имкониятҳои сайёҳии шаҳри Душанбе бо ҷалби намояндагони воситаҳои ахбори омма, аъзои Иттифоқи журналистони Тоҷикистон, Ассотсиятсияи блогерони Тоҷикистон, Иттифоқи рассомони Тоҷикистон ва Иттифоқи аксбардорони Тоҷикистон доир гардид.

Дар рафти намоиш аз ҷониби роҳбаладон доир ба аксҳои ба намоиш гузошта шуда, ки манзараҳои дилфиреб, мавзеҳои сайёҳӣ ва таърихии пойтахт инъикос шудааст, муаррифӣ гардид.

Дар доираи намоишгоҳ хатсайри сайёҳии дохилишаҳрӣ барои намояндагони воситаҳои ахбори омма роҳандозӣ гардид, ки зимни он иштирокчиён аз маконҳои таърихиву фарҳангӣ ва сайёҳии пойтахт дидан намуданд.

Намоиши мазкур аз 16 то 19 апрели соли равон идома хоҳад ёфт, ки аз он тамоми сайёҳону сокинон ва меҳмони пойтахт метавонанд дидан кунанд.