Бо мақсади муаррифии имкониятҳои сайёҳии дохилӣ ва шиносоӣ бо мавзеъҳои табиию истироҳатии мамлакат 9 август хатсайри сайёҳии Душанбе – Айнӣ (Искандаркӯл) – Душанбе барои кормандони сохторҳои Мақомоти иҷроияи ҳокимияти давлатии шаҳри Душанбе баргузор гардид.

Искандаркӯл ҳамчун яке аз мавзеъҳои маъруфи табиии Тоҷикистон дар маркази ин хатсайр қарор дошт. Сафар ба ин минтақа имконият фароҳам овард, ки иштирокчиён аз наздик бо захираҳои табиии кӯҳҳои Фон, имкониятҳои сайёҳии экологӣ, кӯҳгардӣ ва истироҳатӣ, инчунин шароити фароҳамгардида барои қабули сайёҳон шинос шаванд.

Искандаркӯл дар баландии зиёда аз 2000 метр аз сатҳи баҳр ҷойгир буда, бо манзараҳои кӯҳистонӣ, оби мусаффо, дараҳои хушманзара ва иқлими хоси худ аз мавзеъҳои ҷолиби сайёҳии Тоҷикистон ба ҳисоб меравад. Муҳити табиии атрофи кӯл барои ташкили сайру саёҳат, истироҳати фаъол, табиатгардӣ ва дигар намудҳои сайёҳии экологӣ имкониятҳои фаровон дорад.

Дар доираи хатсайр иштирокчиён на танҳо аз мавзеъҳои табиии Искандаркӯл дидан намуданд, балки ба имкониятҳои истифодаи ин захираҳо барои ташкили маҳсулоти муосири сайёҳӣ таваҷҷуҳ зоҳир карданд. Аз ҷумла, масъалаҳои ташкили истироҳати оилавӣ, сайругаштҳои экологӣ, кӯҳгардӣ, хизматрасонӣ ба сайёҳон ва баргузории чорабиниҳои фарҳангиву фароғатӣ мавриди таваҷҷуҳ қарор гирифт.

Яке аз бахшҳои асосии барномаи сафарро чорабиниҳои фароғатӣ ва фарҳангӣ дар соҳили Искандаркӯл ташкил дод. Барои иштирокчиён барномаи истироҳатӣ баргузор гардида, муҳити табиии кӯҳистонӣ барои фароғат, сайругашт ва истироҳати фаъол истифода шуд.

Баргузории чунин чорабиниҳо дар мавзеъҳои табиии сайёҳӣ метавонад ба ҷолибияти бештари хатсайрҳои дохилӣ, зиёд намудани давомнокии будубоши сайёҳон ва ташаккули маҳсулоти гуногуни туристӣ мусоидат намояд.

Ҳамзамон, сафари мазкур барои иштирокчиён имкони шиносоӣ бо иқтидори сайёҳии ноҳияи Айнӣ фароҳам овард. Ин ноҳия дорои захираҳои бойи табиӣ, кӯҳҳои баланд, дараҳои зебо, рӯдҳо ва мавзеъҳои барои рушди намудҳои гуногуни сайёҳӣ мувофиқ буда, яке аз самтҳои муҳими сайёҳии кӯҳии кишвар ба шумор меравад.

Дар рафти сафар ба аҳамияти ҳифзи муҳити зист ва истифодаи оқилонаи захираҳои табиӣ низ таваҷҷуҳ зоҳир гардид. Рушди сайёҳӣ дар чунин мавзеъҳо бояд дар заминаи нигоҳдории экосистемаҳои нодир, тозагии муҳити зист ва фароҳам овардани шароити муносиб барои сайёҳон ба роҳ монда шавад.

Хатсайри Душанбе – Айнӣ (Искандаркӯл) – Душанбе ҳамзамон як навъ муаррифии имкониятҳои сайёҳии дохилӣ ба кормандони мақомоти давлатӣ ба ҳисоб рафта, ба таҳкими фарҳанги сайёҳӣ, тарғиби тарзи ҳаёти солим ва шиносоии бештар бо табиати Тоҷикистон мусоидат намуд.

Ташкили чунин хатсайрҳо имконият медиҳад, ки мавзеъҳои сайёҳии мамлакат на танҳо ҳамчун макони истироҳат, балки ҳамчун бахши муҳими рушди иқтисоди маҳаллӣ, ташкили ҷойҳои нави корӣ, дастгирии соҳибкории соҳаи сайёҳӣ ва муаррифии Тоҷикистон ҳамчун кишвари дорои имкониятҳои васеи сайёҳӣ баррасӣ шаванд.

Барномаи хатсайрҳои сайёҳии дохилӣ бо ташаббуси Мақомоти иҷроияи ҳокимияти давлатии шаҳри Душанбе ва дар доираи иҷрои супоришҳои марбут ба рушди сайёҳии дохилӣ роҳандозӣ гардида, баргузории чунин сафарҳо ба дигар минтақаҳои сайёҳии мамлакат низ то моҳи октябр идома хоҳад ёфт.